船到橋頭眾籌計劃已經啟動喇,
詳情可以喺我哋嘅indiegogo網頁搵到
請大家多多支持!



坪洲    梅窩    芝麻灣    長洲
Peng Chau    Mui Wo    Chi Ma Wan    Cheung Chau
關於   En/中   ︎   ︎


船到橋頭生活節


2020.12.04 – 2020.12.06
坪洲、梅窩、芝麻灣、長洲

歡迎登船!






歡迎參加船到橋頭之旅 :)

今次係咪你第一次搭橫水渡呢?如果係,我哋會推介你好好咁享受吓呢趟穿梭長洲、芝麻灣、梅窩同坪洲嘅慢船河,時而讚歎一下船外嘅風景,沈酣於呢趟旅程嘅慢同靜。呢度雖然唔係香港最經典嘅景色,但佢絕對係截然不同嘅香港大自然一面(好似睇到香港個背脊咁),同樣係香港應該引以自豪嘅好風光。

〈船到橋頭生活節〉借橫水渡呢條航線,將呢幾個離島連結,等大家一齊細味「離島生活」。離島生活源自於同呢片土地同海洋深厚嘅關係,由島上各路人馬一齊創造,共同為佢增添色彩。離島生活一直都係獨樹一格,自成一角,但而家正面臨無可挽回嘅環境危機。生活節嘅初衷,正係想同所有人一齊去體會、保護同發揚離島生活。

你哋可以由三個角度體驗吓離島生活:獨特嘅建築同空間運用、同日常交織嘅大自然,同埋島上多姿多彩嘅傳統同藝術。

我哋有好多唔同嘅節目等緊你,包括工作坊、導賞團、表演、裝置同其他活動。

活動融入咗離島悠閒嘅節奏,唔會高聲鋪張,目的係希望大家一齊享受活動嘅微細恬淡;除咗搭橫水渡由一個島去另一個島參加唔同嘅活動,你重可以嘗試吓喺各個島上面行吓、睇吓、聽吓、感受吓。試吓喺呢度留耐少少,甚至係過夜,領略離島生活嘅精髓……

祝你旅途愉快,船上或者島上見!

〈船到橋頭生活節〉發起人、坪洲居民
阿傑、阿Mei同阿俊

常見問題答咗先







1. 「生活節」即係咩意思?

〈船到橋頭生活節〉以「離島生活」為主旨,想宣揚離島獨特嘅環境、社羣、歷史同議題,探討島同島之間嘅連繫,以及島同城市嘅交流。「離島生活」既係呢個節嘅靈感同精髓,同時亦都係我哋想塑造、充實嘅主題。叫呢個節做「生活節」,最能表達我哋嘅原意。



2. 島仔同藝術 — 係咪即係類似瀨戶內海(藝術祭)咁呀?

小島藝術節難免令人諗起瀨戶內海藝術祭。不過,瀨戶內海藝術祭係想去振興式微嘅島嶼,而橫水渡途經嘅呢幾個地方依然朝氣勃勃;生活節嘅內容同模式,亦都係依離島嘅水土氛圍而生。我哋想保持呢度嘅恬淡,用藝術做引旨,等島上居民同島外遊客進一步領會「離島生活」。



3. 咁即係有咩睇啫?

櫈啦、水牛啦、三輪車啦、紙紮啦、涼亭啦、花草樹木等等都係生活節嘅主菜 : ) 佢哋先至係離島尋常生活嘅精粹。建築師、藝術家、插畫師、表演者同本地機構等等會用佢哋嘅專長烹調呢啲貌似尋常嘅主菜,並以新穎方式展現。去「活動」同「拍檔」睇吓啦!



4. 點樣參加㗎?個節係點玩法?

部分活動例如工作坊同導賞團要預先報名,其他就就咁去都得。去「活動」睇吓每個活動嘅詳情啦。四個地點同時會有活動進行。你可以配搭活動,預留時間俾自己行吓,細味離島生活 (可以睇吓我哋個地圖 : )) 。活動時間就返橫水渡船期,等大家可以參加完一個島嘅活動之後,再搭船去第二個島。生活節希望大家可以放慢腳步,試吓喺度留耐少少,甚至多過一日,體驗一下離島生活。一齊試吓啦!



5. 啲離島有乜咁特別呢?

離島四面環海,每個島都係自成一角嘅一塊土地,主要以渡輪來往其他地區(梅窩除外)。呢種獨立性,令每個離島嘅城鄉面貌、自然同文化都別樹一格。而呢幾個離島再同世界上大部分嘅島唔同嘅地方,就係佢哋同市中心又近又緊密,最多搭一個鐘船就到中環。離島雖然自成一角但又觸手可及,加上自然風光仍然得以保存,可以話係香港又一奇妙之處,呢個亦都係我哋想搞呢個節嘅原因之一。



6. 啲乜節乜節都係鼓吹消費啫。你點用生活節去帶嚟改變?

〈船到橋頭生活節〉紮根離島,發掘本地嘅長處,繼從而發揮宏揚。個節想令本地居民、有心人、以及唔同嘅機構互相連繫,展開新嘅合作,令傳統可以融入時代,繼續傳承落去。當我哋設計生活節嘅每個環節嘅時候,都會以上述嘅目標作考量,並喺當中加入少少咸、多多趣 🥜.



7. 你點睇啲人入嚟啲島搞貴啲租,搞到啲島變晒質(即係士紳化)?

冇人可以制止改變,但我哋可以嘗試令呢啲改變轉向。

離島越來越受關注,令到唔少人搬入嚟。有說咁樣會導致租金上漲,本土風情褪色。我哋冇辦法制止人搬入坪洲,但係我哋可以展現點去欣賞同融入本地文化,一齊建立一套社區嘅共識,令所有居民都可以參與同受惠。



8. 咁你係想多啲遊客入嚟呀?

生活喺呢幾個地方嘅島民,先至係生活節最想幫助最重要嘅參與者人。而生活節嘅活動,亦以加強呢幾個地方之間嘅連繫為目標。

離島越嚟越受遊客歡迎,隨之引起部分居民嘅不滿。與其將遊客拒諸島外(先唔計係咪行得通),倒不如令佢哋理解離島嘅文化同環境,繼而尊重呢幾個地方嘅節奏同生活。坐橫水渡由一個島去另一個島,期間可以欣賞呢片海域、附近嘅島,同埋島上嘅人。大眾應該要有機會深入感受香港絢麗多姿嘅大自然、生活同文化,從而改變佢哋嘅睇法,而我哋相信輕鬆嘅郊遊係一個有效嘅方法。   



9. 搞個生活節嚟做乜?

我哋想用生活節帶動唔同人去感受呢種生活,發掘佢嘅可貴之處,並請所有人用自己嘅方法,去保護離島生活同呢個地方。



10. 你哋邊位?邊個搞㗎呢壇嘢?

我哋係三個坪洲街坊,住咗喺度幾年。眼見呢幾年同將來有機會出現嘅劇變,我哋想搞呢個生活節去連繫所有珍惜呢個地方嘅人。
 

策劃








〈船到橋頭生活節〉由Myriem Alnet、陳俊傑和葉啟俊策劃。三人均為坪洲街坊,住咗幾年。

Myriem係個城市研究者,阿傑係坪洲「陸日小店」嘅創辦人之一, 阿俊係個藝術家同策展人。Myriem同阿傑今年創辦咗一本有關離島嘅雜誌《ISLANDERS 島民》,而阿俊亦都有喺坪洲搞過小型藝術活動。

三人希望更進一步,為小島的文化生活出一分力。

策劃 
Myriem Alnet
陳俊傑
葉啟俊

統籌(長洲)
黎穎欣

統籌(梅窩)
陳希雯
吳若琪

設計 
Studio Orbit

撰稿、編輯
施揚